Кој ќе го замени Кристијано Роналдо? Пет играчи на списокот на Реал Мадрид

Во претходните неколку дена се зборуваше за тоа дека Кристијано Роналдо го напушта Реал Мадрид, а наводно Јувентус веќе има подготвено понуда за еден од најдобрите играчи на светот.

Роналдо во Реал Мадрид пристигна пред девет години, а со „Кралевите“ освои повеќе титули. Сепак, во последно време се повеќе се зборува за тоа дека Португалецот го напушта „Сантијаго Бернебеу“, а угледниот весник Марка објави дека Јувентус подготви понуда од 120 милиони евра.

Флорентино Перез свика итен состанок во просториите на клубот, а тоа говори за сериозноста на оваа ситуација. Перез сака да го слушне мислењето на Роналдо, односно дали тој сака да го напушти Реал Мадрид. Доколку Португалецот каже дека е време за разделба, се очекува дека Перез нема да му прави проблеми.

Во Реал Мадрид полека, полека почнаа да размислуваат што ќе биде откако Роналдо ќе го напушти клубот, а веќе се прави и листата на играчи кои би можеле да го заменат овој играч. На листата на желби на „Кралевите“ се наоѓаат пет фудбалери, а тоа се Еден Азард, Килијан Мбапе, Хари Кејн, Нејмар и Антоин Гризман.

Марка објави дека Нејмар е прва желба на Перз. Исто така во последно време со „Кралевите“ често се поврзуваат со Мбапе, но и тоа е само една од низата на бројни шпекулации.