Мираковски поради повреда ја пропушта финалната серија

 Капитенот на Работнички, Димитар Мираковски, ќе ги пропушти останатите натпревари од финалната серија од плејофот против МЗТ Скопје.

На лекарските прегледи денеска е утврдено дека повредата на Мираковски е сериозна. Станува збор за скинат мускул, а ќе треба да паузира од шест до осум седмици.

Плејмејкерот се повреди пред крајот на втората четвртина од првиот натпревар од финалната серија во „Градски парк“, на кој Работнички поведе со 1:0.

Тренерот Марин Докузовски ќе мора да смисли алтернативни решенија на плејмејкерската позиција пред следниот натпревар од финалето, кој се игра во среда во „Јане Сандански“.