ТАНЕВСКИ СО ПРОФЕСИОНАЛНА АНАЛИЗА ЗА СП: Шпанија е тактички најкомплетна, климатскиот шок ќе биде најголем проблем за фаворитите

Новопечениот сопственик на највисоката УЕФА Про лиценца и актуелен фудбалски стратег, Александар Таневски, во премиерното издание на „Мундокаст“ на 4ТВ направи детална ретроспектива и стручна анализа на репрезентативните сили пред претстојниот Мундијал во Северна Америка.

Според Таневски, доколку се анализира чистиот фудбалски квалитет, структурата и начинот на контрола на играта, една репрезентација отскокнува пред останатите.

„Шпанија, по мое мислење, е тактички и екипно најдобро структурираната репрезентација во овој момент. Имаат јасна визија под водство на Де ла Фуенте и извонреден баланс. Веднаш зад нив ги гледам Франција на Дидие Дешам и Бразил предводен од Карло Анчелоти. Тоа се селекции кои имаат врвни тренерски авторитети, докажани стратези кои перфектно знаат како да раководат со соблекувални полни со големи ѕвезди и фудбалски уметници“, истакнува Таневски.

Климатскиот шок — најголемиот непријател на европските гиганти

Сепак, покрај тактиката на теренот, македонскиот стратег става сериозен акцент на надворешните фактори кои директно ќе влијаат врз крајниот исход на првенството, а тоа се непредвидливите временски услови и суровиот распоред.

„Фудбалерите ќе се соочат со игра во три различни временски зони. Не е исто да играте на 38 степени со огромна влажност на воздухот, а по неколку дена следниот натпревар да го играте на 18 степени. Тоа е огромен шок и стрес за организмот. Тука ќе настане голем проблем околу регенерацијата на играчите. Повеќето од нив доаѓаат од Европа каде што зад себе имаат исцрпувачки клупски сезони. Тие се веќе емотивно и физички истрошени. Затоа фудбалот е толку интересен, бидејќи овие детали можат целосно да ги израмнат силите на теренот.“

Регионалните сили и изненадувања од сенка

Во однос на репрезентациите кои можат да ги помрсат сметките на главните фаворити, Таневски гледа сериозен потенцијал во неколку селекции, со посебен фокус на нашиот регион.

„Босна и Херцеговина под водство на Сергеј Барбарес има навистина интересна стратегија. Доколку успеат да ја поминат групната фаза, која е оценета како поминлива, во нокаут-системот сè е можно. Исто така, би ја издвоил и Турција. Винченцо Монтела прави одлична работа таму — создаде специфична структура на игра која е мешавина од стара и нова тренерска школа. Кај нив јасно се гледа позитивната хемија, поддршката во тимот и огромната самодоверба, што ги прави исклучително незгоден противник за секого“, заклучува Таневски во својата мундијалска анализа за „Мундокаст“.