Англија ја совлада Хрватска во првото вистинско дерби на Мундијалот

Англиската фудбалска репрезентација со победа го започна настапот на Светското првенство 2026, откако во возбудлив натпревар во Далас ја совлада Хрватска со 4:2 во рамките на првото коло од групата Л.

Хари Кејн го отвори резултатот во 12. минута од повторен пенал, а Хрватска возврати преку Мартин Батурина во 36. минута. До крајот на првото полувреме Кејн повторно погоди за Англија, додека Муса донесе ново израмнување за „коцкестите“ за 2:2.

Само две минути по почетокот на второто полувреме Џуд Белингам ја врати предноста на Англичаните, кои потоа доминираа на теренот и создадоа повеќе опасни шанси. Иако Доминик Ливаковиќ со неколку одлични интервенции ја одржуваше Хрватска во игра, Маркус Рашфорд во 85. минута ги постави конечните 4:2.

Со оваа победа Англија направи голем чекор кон пласман во осминафиналето, додека Хрватска ќе бара поправен испит во следното коло против Панама. Англичаните, пак, ќе се соочат со Гана.