Аргентина здивна: Меси има замор на мускулот, но нема скинати влакна

Тревогата во Аргентина значително се намали откако стана јасно дека Лионел Меси нема сериозна повреда. Големата ѕвезда на националниот тим почувствува непријатност на последниот натпревар на Интер Мајами во МЛС и беше заменет во 72. минута, што веднаш предизвика загриженост во пресрет на Светското првенство.

Меси се пожали на болка во задниот дел од левата натколеница и веднаш се упати кон соблекувалната, а ситуацијата дополнително ги зголеми стравувањата кај аргентинските навивачи.

Неговиот тренер Анхел Гиљермо Ојос по натпреварот не сакаше да ризикува со проценките.

„Кога постои и најмало сомневање, логично е да не се презема никаков ризик“, изјави тој.

Сепак, официјалното соопштение на Интер Мајами донесе олеснување. Клубот, повикувајќи се на медицинските анализи на Baptist Health, соопшти дека не станува збор за мускулно скинување.

„Капитенот на Интер Мајами го напушти теренот поради физички дискомфорт. По дополнителните медицински прегледи беше утврдено дека станува збор за преоптоварување поврзано со мускулен замор на задниот мускул на левата натколеница. Времето за закрепнување ќе зависи од неговата клиничка и функционална состојба“, се наведува во соопштението.

Информацијата дека Меси нема скинат мускул донесе големо олеснување во Аргентина, бидејќи првичните стравувања беа дека би можел да го пропушти Светското првенство или барем неговиот почеток.

Сепак, загриженоста не исчезнува целосно. Дијагнозата за преоптоварување и замор најверојатно ќе значи дека Меси ќе ги пропушти следните пријателски натпревари како мерка на претпазливост.

Иако е избегнат најлошиот можен развој на настаните, во Аргентинската фудбалска асоцијација останува внимателноста. Три недели пред стартот на Мундијалот 2026 во САД, Мексико и Канада, каде Аргентина ќе ја брани светската титула, Меси ќе биде под посебен медицински надзор за да се избегнат нови мускулни проблеми.