Експертите предупредуваат: Светското првенство 2026 се соочува со топлотен шок и екстремни прекини

Претстојното Светско првенство во фудбал, кое ќе се одржи во САД, Мексико и Канада, би можело да донесе сериозни логистички и здравствени предизвици поради екстремните временски услови. Според најновите климатски студии презентирани во дебатниот магазин „Мундокаст“ на 4ТВ, дури 25% од натпреварите ќе се играат на температури повисоки од 26 степени Целзиусови, а голем дел ќе надминат и критични 28 степени.

Кога САД последен пат беше домаќин во 1994 година, температурите на теренот надминуваа и 40 степени, но поради глобалното затоплување, денес интензитетот на овие топлински бранови е дополнително зголемен.

Дополнителен проблем за организаторите ќе бидат строгите безбедносни протоколи за невреме со грмотевици. Доколку се лоцира силен удар од гром или молња во радиус од 15 километри околу стадионот, натпреварот веднаш ќе мора да биде прекинат во времетраење од 30 минути. Доколку во тој тајминг удри нов гром, паузата се продолжува, што значи дека навивачите би можеле да гледаат фудбалски натпревари кои со прекините ќе траат и по 5 до 6 часа.

Играњето во три различни временски зони, огромната влажност на воздухот и варијациите од 18 до 38 степени Целзиусови ќе претставуваат огромен стрес за организмот на фудбалерите, па фокусот на стручните штабови ќе биде ставен на брзата медицинска регенерација.