Евролигата го казни Партизан поради транспарент на кој Обилиќ го убива султанот Мурат

Раководството на Евролигата го казни Кошаркарскиот клуб Партизан со 40.000 евра поради кореографијата што ја подигнаа „Гробарите“ за време на натпреварот против Фенербахче, на која Милош Обилиќ го убива султан Мурат.

Стануваше збор за натпревар од 12. коло на Евролигата на 21 ноември, кога кошаркарите на Фенербахче ја совладаа во Белград екипата на Партизан со резултат 99:87.

Домашните навивачи го отворија натпреварот со кореографија со која сакаа да ја прикажат митолошката сцена во која Милош Обилиќ го убива султан Мурат, а потоа ја испеаја и песната: „Секој Турчин знае, секоја була знае…“.

Дисциплинската комисија на Евролигата поради тоа го казни Партизан со 40.000 евра, а доколку се случи сличен инцидент, клубот може да се соочи и со играње пред речиси празни трибини, односно само пред 20 проценти од капацитетот на салата.