ФФМ во финансиски минус од еден милион евра

Фудбалската федерација на Македонија (ФФМ) денеска го одржа своето редовно изборно генерално собрание, на кое актуелниот претседател Масар Омерагиќ беше единствениот кандидат и доби нов четиригодишен мандат. Меѓу главните теми на Собранието беше финансиската состојба во федерацијата, каде што Омерагиќ откри загрижувачки податоци – долг од еден милион евра.

„Важно е да зборуваме транспарентно за финансиската состојба, бидејќи секоја стабилна и успешна организација мора да се потпира на одговорно управување со средствата. Факт е дека во изминатите две години федерацијата имала повеќе расходи отколку приходи. Само во реалното работење, федерацијата е во минус од еден милион евра“, изјави Омерагиќ пред делегатите.

Тој посочи дека ваквата финансиска состојба е резултат на лошо планирање, недостаток на контрола и пробиен буџет, особено во Фудбалската академија, која, наместо да биде центар за развој на млади таленти, се соочувала со непродуктивни трошоци и несоодветни услови за работа.

Новото раководство на ФФМ ќе се соочи со сериозен предизвик за финансиска стабилизација, а Омерагиќ најави дека приоритет во неговиот нов мандат ќе биде враќањето на финансиската рамнотежа и воспоставување на поефикасна стратегија за управување со средствата.