Хаос со дресот на Реал Мадрид, француска продавница го стави на продажба по грешка пред официјалното претставување

Неочекуван инцидент избувна околу третиот дрес на Реал Мадрид. Продавница „Интерспорт“ во Нормандија, Франција, го стави по грешка на продажба многу порано од официјалното претставување од страна на клубот и Адидас.

Веста ја објави шпанскиот дневник „Марка“, кој прв го откри и дизајнот на новиот дрес. Новинарите ја контактираа директорката на продавницата, Морган Обри, која објасни дека сето тоа се случило поради „грешка во комуникацијата со брендот“.

Според извештајот, дресот беше на продажба цела недела пред да биде отстранет од полиците, додека се чека официјалното претставување. Сепак, по оваа грешка, изненадувањето од откривањето на дресот речиси целосно згасна, бидејќи дизајнот веќе стана познат.