Кошаркарите на Србија го освоија бронзениот медал на Олимписките игри!

Српските кошаркари ја освоија бронзата на Олимписките игри во Париз со победата над Германија со 93:83. Србија одлично го отвори натпреварот и многу брзо поведе со шест поени разлика (9:3), а по првите 10 минути игра водеше со девет поени разлика (30:21).

На почетокот на втората четвртина избраниците на Светислав Пешиќ отидоа на плус 14 (37:23), а Германците до полувремето успеаја да ја намалат разликата на осум поени, а Србија во вториот дел влезе со предност од 46:38.

Србија во првите две и пол минути од третата четвртина направи серија од 6:0 и поведе со 52:38. Меѓутоа, кога Германците повторно стигнаа до едноцифрена негатива (54:45), Алекса Аврамовиќ погоди тројка за само 30 секунди, па двапати положи за 61:45, а Огњен Добриќ потоа го зголеми резултатот на максимални +19 со тројка (64:45 ).

Сепак, Германците набрзина ја намалија негативата на 10 поени за само една минута (67:57), а Србија во последната четвртина влезе со девет поени предност (72:63). Во средината на последната четвртина Германците намалија на осум поени разлика (82:74), но повеќе од тоа не можеа и Србија заслужено го освои третото место. Србија до бронзата ја предводеа феноменалниот Никола Јокиќ, кој оствари трипл-дабл учинок (19 поени, 12 скока, 11 асистенции), Василије Мициќ (19 поени) и Богдан Богдановиќ (16 поени). Ова е втор пат Србија да освојува олимписки медал под таа титула, бидејќи пред осум години го освоија среброто во Рио. Претходно, како СР Југославија, освоија сребро и во Атланта во 1996 година, а двата пати беа поразени во финалето од Соединетите Американски Држави.

Да потсетиме, во борбата за златото вечерва од 21:30 часот се среќаваат Соединетите Американски Држави и Франција.