Кристијано Роналдо со апел по киксот на Португалија

Португалија започна разочарувачки на Светското првенство 2026 со реми 1:1 против ДР Конго, и покрај целосната иницијатива на теренот. Натпреварот во Хјустон остави горчлив вкус кај навивачите и фудбалерите на европскиот шампион од 2016 година.

Кристијано Роналдо не се запиша меѓу стрелците и неговата голгетерска суша на големи турнири продолжи — веќе 10 последователни натпревари за националниот тим без погодок. Во текот на мечот ретко добиваше квалитетни додавања и најчесто шутираше од тешки позиции, кои не ја загрозија сериозно противничката мрежа.

Веднаш по мечот капитенот испрати порака до навивачите преку Инстаграм: „Ова не беше стартот што го посакавме, но далеку од тоа дека е завршено. Горе главите, се фокусираме на следниот меч.“

Португалија сега го пренасочува вниманието кон следните два дуели во групата, против Узбекистан и Колумбија, каде ќе бара цел плен за да го потврди фаворитскиот статус и да ја преземе контролата врз пласманот.

И покрај киксот на стартот и продолжената негатива на Роналдо, избраниците на Роберто Мартинес демонстрираа доминација и создадоа низа изгледни шанси. Во продолжение ќе биде клучна поголема прецизност во завршницата за впечатливата игра да се претвори во убедливи резултати.