Л’Екип изненади: Не ни играше на Мундијалот, а сега е фаворит за Златната топка!

По завршувањето на Светското првенство, во фудбалската јавност повторно се разгореа дебатите околу тоа кој фудбалер треба да ја освои „Златната топка“, а навистина е тешко да се пронајде идеален кандидат за најпрестижната индивидуална награда во овој спорт.

Како главни кандидати се споменуваат Ламин Јамал, Родри, Лионел Меси, Усман Дембеле, Хари Кејн и Килијан Мбапе, но за секој од нив може да се најдат сериозни аргументи зошто не би требало да ја добие „Златната топка“. Угледниот француски весник L’Équipe утрово изненади со насловната страница на своето ново издание.

Имено, L’Équipe на својата насловна страница како главен фаворит за освојување на „Златната топка“ го посочи Грузиецот Хвича Кварацхелија, кој воопшто не настапи на Светското првенство, но во текот на клупската сезона веројатно беше и најдобриот играч на Пари Сен Жермен, предводејќи го тимот до титулите во Лигата на шампионите и француската Лига 1.

Кварацхелија, секако, никогаш не може да биде рамноправен со претходно наведените фудбалери кога станува збор за репрезентацијата за која настапува, бидејќи игра за Грузија – една од послабите европски селекции. Поради тоа, тој е во неповолна положба во трката за индивидуалните признанија.

Популарниот „Кварадона“ особено воодушеви во Лигата на шампионите минатата сезона, каде што на 16 натпревари постигна 10 голови и забележа седум асистенции, додека во француското првенство запиша осум голови и четири асистенции.

Што се однесува до останатите кандидати за „Златната топка“, Јамал настапи под своето вообичаено ниво на Светското првенство и не придонесе за освојување на титулата како што тоа го направи пред две години на Европското првенство, додека Родри зад себе има послаба клупска сезона со Манчестер Сити.

Мбапе блескаше на Мундијалот и беше најдобар стрелец со 10 голови, но Франција на крајот го освои само четвртото место, а извонредниот напаѓач со Реал Мадрид не успеа да освои ниту еден трофеј. На Дембеле исто така му се замерува слабиот пласман на француската репрезентација на Светското првенство, како и на Кејн со Англија, покрај неуспехот на Баерн Минхен во Лигата на шампионите.

Меси беше фаворит на многумина за „Златната топка“ додека Аргентина чекореше кон светската титула, но на крајот не успеа да ја освои. Поради тоа, сосема е нереално да се очекува фудбалер на Интер Мајами да ја добие најпрестижната индивидуална награда додека настапува во лига која е далеку под квалитетот на најсилните европски натпреварувања.

Јубилејната 70-та церемонија на доделувањето на „Златната топка“ ќе се одржи на 26 октомври 2026 година, а организатор е списанието France Football, кое има ист сопственик како и L’Équipe, медиумот што го фаворизира Кварацхелија во оваа трка.