Македонија по 360 дена, конечно постигна гол, но од Глазгов се враќа со празни раце

Македонската фудбалска репрезентација го доживеа и петтиот пораз во Лигата на нациите откако загуби на гостувањето кај Шкотска со 2:1.

Сепак, овој натпревар ќе остане запаметен по тоа што нашата селекција конечно го прекина црниот голгетерски пост.

По неверојатни 844 минути активна игра и 360 дена без постигнат погодок, топката повторно заврши во противничката мрежа.

Домашната репрезентација прва дојде во водство преку МекГин во 54-та минута.

По голот,  Македонија заигра похрабро и успеа да постигне гол.

Радоста пристигна во 57-мата минута кога Елмин Растодер, по корнерот на Енис Барди, го постигна својот прв гол во репрезентативниот дрес за израмнување на 1:1.

Иако овој првенец на Растодер донесе нова енергија и надеж за освојување бод на тешкото гостување, тоа не се случи.
Шкотска брзо ги консолидираше своите редови и повторно го презеде притисокот на нашата половина од теренот.

Во завршницата од мечот домаќините постигнаа и втор погодок од пенал исто така преку МекГин со кој го поставија конечниот резултат на средбата.

Така, и покрај прекинувањето на негативната серија, Македонија со празни раце се враќа од гостувањето во Глазгов.