Меси влезе во историјата со голови на пет различни светски првенства

Лионел Меси повторно го запиша своето име во историјата на светските првенства. Со хет-трик против Алжир на Светското првенство 2026, аргентинската суперѕвезда се приклучи на Кристијано Роналдо во елитното друштво на фудбалери кои постигнале голови на пет различни изданија на турнирот.

Отворајќи го резултатот за Аргентина во дебитантскиот меч на репрезентацијата на овој Мундијал, легендарната десетка стана само втор играч во историјата со вакво достигнување. Досега Меси погодуваше на светските првенства во 2006, 2014, 2018 и 2022 година, а со голот во 2026 го израмни учинокот на својот голем ривал Кристијано Роналдо, кој има погодоци во 2006, 2010, 2014, 2018 и 2022 година. Ниту еден друг фудбалер не успеал да постигне гол на пет различни мундијали.

Меси настапи и на Светското првенство 2010, но тогаш не се запиша меѓу стрелците и покрај тоа што одигра пет натпревари. Со најновиот подвиг, на 39-годишна возраст и во своето шесто учество на Мундијал, капитенот на Аргентина продолжува да руши рекорди и да ја збогатува веќе легендарната кариера, во која во 2022 година го подигна трофејот на светскиот првак.

Пред почетокот на ова издание, списокот на фудбалери со голови на четири различни светски првенства ги вклучуваше Пеле, Уве Зелер и Мирослав Клозе, како и самиот Меси. Со погодокот против Алжир, тој се искачи едно скалило погоре и застана рамо до рамо со Кристијано Роналдо, споделувајќи едно од најретките достигнувања во историјата на спортот, цели две децении по неговиот дебитантски настап во Германија во 2006 година.