Најмалиот стадион на Мундијалот ќе ја отвори Канада против БиХ

Канаѓаните турнирот ќе го отворат на 12 јуни со натпревар против Босна и Херцеговина, а пред почетокот на мечот ќе се одржи свечена церемонија на отворање на која ќе настапат Мајкл Бубле, Аланис Морисет и Алесија Кара.

Торонто е најголемиот град во Канада со повеќе од три милиони жители и еден од најразновидните градови во Северна Америка. Градските власти најавуваат дека Светското првенство ќе остави трајно наследство преку инвестиции во спорт, инфраструктура, локални заедници и одржлив развој.

Стадионот официјално го носи името „БМО Филд“ поради договорот со Банката на Монтреал, но според правилата на ФИФА за време на турнирот ќе биде преименуван во „Торонто Стадиум“.

Изградбата почнала во 2006 година, откако Торонто добил клуб во МЛС-лигата и бил избран за домаќин на Светското првенство до 20 години. Ова е првиот стадион во Канада специјално изграден за фудбал.

На стадионот првиот натпревар го одигра Торонто ФК во 2007 година, а истото лето младите Серхио Агуеро и Анхел Ди Марија блеснаа на младинскиот Мундијал, носејќи ѝ ја титулата на Аргентина.

Во моментов капацитетот на стадионот изнесува 29.000 гледачи, но за потребите на Светското првенство ќе бидат поставени дополнителни трибини, со што капацитетот ќе се зголеми на 44.315 места. И покрај проширувањето, ова ќе биде стадионот со најмал капацитет на турнирот.

Теренот користи хибридна подлога со 95 проценти природна трева, зајакната со вештачки влакна. Стадионот нема целосен покрив, но делумно покрива три трибини.

Во Торонто ќе се играат шест натпревари, меѓу кои и дуелите Германија – Брег на Слоновата Коска, Гана – Панама, како и еден натпревар од шеснаесетфиналето.