Не е Трамп, ова е човекот кој го поништил црвениот картон на Балогун, не консултирал 17 луѓе, а требал!

Сè уште не стивнуваат реакциите поради епскиот скандал на Светското првенство во Америка, каде што ФИФА му го поништи црвениот картон на Фоларин Балогун, напаѓачот на репрезентацијата на Соединетите Американски Држави.

Поточно, суспензијата од еден натпревар неиграње му беше преиначена во условна казна во траење од една година, што досега не е забележано во светот на фудбалот, а денеска испливаа нови детали за скандалот.

Откриено е дека црвениот картон на Балогун бил поништен на целосно неверојатен начин, бидејќи во самото поништување на суспензијата учествувал само еден од 18-те членови на Дисциплинската комисија на ФИФА.

Клучниот човек во оваа „операција“ на Американците бил претседателот на Дисциплинската комисија на ФИФА, Мохамад Ал Камали од Обединетите Арапски Емирати, кој самостојно донел одлука за поништување на суспензијата на Балогун.

Ал Камали воопшто не ги консултирал останатите 17 членови на Комисијата, што дополнително ги поттикна сомнежите дека бил под влијание или притисок од надворешен фактор.

Ал Камали е истакнат правен експерт од Обединетите Арапски Емирати. Покрај фудбалот, тој оставил значаен белег и во спортската администрација на својата земја. Извршувал важни функции во Националниот олимписки комитет на ОАЕ, каде што работел на промоција на олимписките вредности и развојот на спортот.

Да потсетиме, Балогун го заработи црвениот картон на натпреварот меѓу САД и Босна и Херцеговина во шеснаесетфиналето на Светското првенство, а потоа казната беше поништена за да може да настапи во осминафиналето.

Сепак, тоа не им помогна на Американците, кои во таа фаза од натпреварувањето беа убедливо поразени од Белгија со 4:1.