Ова е Барселона на германски погон, седум од седум во Примера (ВИДЕО)

Фудбалерите на Барселона во седмото коло од шпанското првенство го победија Хетафе со 1:0 и со тоа ја продолжија извонредната серија во новата сезона. Тимот на Ханси Флик ја забележа седмата победа во исто толку одиграни натпревари и е единствениот тим во лигата со 100% учинок.

Каталонците беа подобриот ривал на овој меч, а победата ја постигнаа во 19. минута од средбата кога Полјакот Роберт Левандовски ја погоди мрежата на противничкиот голман. До крајот на натпреварот Каталонците напаѓаа и се обидуваа да се заканат кон голот на Давид Сорија, но не успеаја, па натпреварот заврши со победа на Барселона, 1:0.

Барса и натаму е прва со 21 бод од седум одиграни натпревари, додека Хетафе е на 19. позиција со четири освоени бода. Во следното коло Барселона гостува кај Осасуна, додека Хетафе на домашен терен го пречекува Алавес.