Паузата на полувремето во финалето на Светското првенство ќе трае 25 минути!
Паузата меѓу двете полувремиња на финалниот натпревар од Светското првенство во фудбал, кој ќе се одигра во недела на стадионот „Њујорк Њу Џерси“, треба да трае меѓу 20 и 25 минути поради музичката програма по примерот на Супербоул.
За време на паузата ќе се одржи 11-минутен спектакл, чии главни ѕвезди се Мадона, Шакира и јужнокорејската К-поп група BTS.
Извори од Светската фудбалска федерација (ФИФА) наведуваат дека полувремето треба да трае околу 20 минути, додека како една од можностите се разгледува по вообичаената 15-минутна пауза да се одржи планираната музичка програма, се наведува на страницата на ФИФА.
Правилата на фудбалската игра, кои ги донесува Меѓународниот одбор на фудбалските сојузи (ИФАБ), пропишуваат дека играчите имаат право на одмор меѓу двете полувремиња кој не смее да трае подолго од 15 минути.
Паузата за време на минатогодишното финале на Светското клупско првенство, кое исто така го организираше ФИФА и се одигра во Њу Џерси, траеше вкупно 24 минути. Тогаш настапија Coldplay, J Balvin, Doja Cat, Tems и Emmanuel Kelly.
На програмата на финалето на Светското првенство минатата недела ѝ се приклучи и Џастин Бибер, а покрај главните изведувачи ќе настапат Burna Boy, Gustavo Dudamel и хорот PS22 заедно со Coldplay. Програмата ја осмисли и продуцираше фронтменот на Coldplay, Крис Мартин.
Со продолжувањето на паузата меѓу двете полувремиња, ФИФА ќе ги прекрши и сопствените фудбалски правила, во кои е наведено дека паузата меѓу двете полувремиња трае 15 минути.
Финалниот натпревар ќе започне во 15 часот по локално време, односно во 21 часот по средноевропско време, додека завршната церемонија ќе започне час и половина порано.
Во церемонијата ќе учествуваат Том Круз, Лаура Паузини, Никол Шерцингер, Роби Вилијамс и интернет-ѕвездата IShowSpeed, додека американската химна ќе ја изведе Џенифер Хадсон.
Репрезентацијата на Шпанија се пласираше во финалето откако во вторникот во Далас ја совлада Франција со резултат 2:0.
Шпанците за титулата светски првак ќе се борат против победникот од вториот полуфинален натпревар меѓу Англија и Аргентина, кој се игра во среда во Атланта.
