Погба сè уште слободен играч и бара нова можност

Пол Погба сè уште е во потрага по својот следен предизвик. По раскинувањето на договорот со Монако во текот на летото, францускиот играч за врска моментално е слободен играч и ги разгледува опциите за оживување на кариерата која последните години заглави поради повреди и проблеми надвор од теренот.

На возраст од 33 години, освојувачот на Светското првенство 2018 сè уште не одлучил за својата иднина. Неговото искуство во Кнежеството се покажа како тешко. Откако му беше намалена казната за допинг, Погба забележа само шест настапи за клубот предвреме да стави крај на договорот кој се очекуваше да трае две сезони.

Враќање на највисоко ниво на европскиот фудбал моментално изгледа невозможно. Според ‘Дејли Мејл’, шампионатот на Мajor League Soccer (MLS) е најреалистична дестинација за Французинот. Неговите претставници почнаа да ги истражуваат можностите со различни американски клубови уште во август.

Името на Погба е поврзано со неколку американски клубови. Се зборува за можен интерес од Д.Ц. Јунајтед, Интер Мајами на Дејвид Бекам (каде што игра Лионел Меси) и Њујорк Сити ФК. Сепак, моментално нема напреднати преговори или официјални контакти.

Преселба во Америка може да му понуди на Погба можност да ја врати стабилноста, минутите на теренот и менталната смиреност во лига која врши помал притисок врз играчите во споредба со европскиот фудбал. Во меѓувреме, преселба во Саудиска Арабија останува помалку веројатна, барем за сега.