Поради тетоважа исфрлен од репрезентацијата на Германија: Никогаш повеќе не ме повикаа!

ПОРАНЕШНИОТ германски репрезентативец Керем Демирбај повторно ја коментираше својата одлука да игра за Германија наместо за Турција. Демирбај тврди дека селекторите престанале да го повикуваат во репрезентацијата откако ја виделе тетоважата со Турција на неговиот грб.

Првичниот избор била Турција

Демирбај раскажа дека првично сакал да настапува за Турција, но поради околности за кои не сакал да открие детали, на крајот морал да ја избере германската репрезентација.

„Мојата крв е турска. Јас сум Турчин. Татко ми е Турчин, мајка ми е Турчинка, јас сум Турчин. Сакав да играм за Турција и 18 месеци се обидувавме да договориме сè со фудбалскиот сојуз. Сепак, поради некои работи за кои не смеам да зборувам, морав да ја изберам Германија“, изјави Демирбај.

Инцидентот по постигнатиот гол

За германската репрезентација дебитираше во 2017 година. На Купот на конфедерациите постигна гол против Камерун, а по погодокот го соблече дресот и ја покажа својата тетоважа.

„Откако постигнав гол за Германија, го соблеков дресот и тие ја видоа тетоважата со Турција на мојот грб. По тоа никогаш повеќе не ме повикаа“, тврди Демирбај.

🇹🇷🇩🇪 Kerem Demirbay

🗣️ “My blood is Turkish. I am Turkish. My father is Turkish, my mother is Turkish – I am a Turk.

I wanted to play for Türkiye and we chased the federation for 1.5 years. But because of certain things I can’t talk about, I had to choose Germany.

After scoring a goal for Germany, I took off my shirt and they saw the Türkiye tattoo on my back. After that, they never called me up again.

I would never play for Germany again, even if they called me right now. I am Turkish.

My biggest regret will always be never having worn the glorious Turkish National Team jersey.”

— Turk Scout (@ScouTurk) October 18, 2026

„Никогаш повеќе не би играл за Германија“

Тој додаде дека не би играл за Германија дури и ако сега добие повик.

„Никогаш повеќе не би играл за Германија, дури и ако ме повикаат сега. Јас сум Турчин. Најмногу секогаш ќе жалам за тоа што никогаш не го облеков дресот на турската репрезентација“, изјави тој.

Ова не е првпат Демирбај да зборува на оваа тема. Минатата година, во интервју за Tivibu Spor, изјави дека за Германија „никогаш не играл со срце“, а таа изјава тогаш ја пренесе турскиот весник Hürriyet.

Овој 33-годишен играч од средниот ред моментално е член на Касимпаша. Во текот на кариерата настапувал и за Ејупспор, Галатасарај, Баер Леверкузен, Хофенхајм, ХСВ, Фортуна Дизелдорф, Кајзерслаутерн, како и за вториот тим на Борусија Дортмунд и младинските категории на Шалке.

Тој настапувал за сите младински селекции на Турција, додека за сениорската репрезентација на Германија забележал два настапа и постигнал еден гол.