Сер Алекс Фергусон: Бев разочаран од него, една ноќ Мурињо ми се јави плачејќи…

Утре, во вторник, 11 август, ќе биде објавен на „Нетфликс“ документарецот за Жозе Мурињо. Во него се открива дека Португалецот можел да стане тренер на Манчестер Јунајтед, заменувајќи го Сер Алекс Фергусон во 2013 година, веднаш по заминувањето од Реал Мадрид. Но, кога сè изгледало дека Мурињо ќе оди на „Олд Трафорд“, тој на крајот потпишал со Челси.

„Кога си заминав од Реал Мадрид, потпишав со Манчестер Јунајтед за да го заменам Сер Алекс“, – раскажа Мурињо во документарецот. Фергусон го потврди: „Му беше понудена позицијата, тоа е вистина. Му ја објаснив ситуацијата. Од моја страна, имав впечаток дека ја прифати. И потоа, во рок од неколку часови, сè се промени.“

Мурињо доби понуда да се врати во Челси, екипа која ја водеше од 2004 до 2007 година, и ја прифати, одбивајќи ги „Црвените Ѓаволи“. „Една ноќ ми се јави плачејќи и ми рече: Алекс, не можам повеќе. Му дадов збор на Челси и нема да го прекршам“, – откри Фергусон, додавајќи: – „Можев да ја разберам неговата причина, но бев разочаран.“

Мурињо призна дека губењето на можноста да го замени Фергусон било драматично, но рече дека не жали. „Беше одлука која ја донесов со срце. Верувам дека Ниче рекол дека кога некој прави нешто од љубов, никогаш не греши. Тоа беше нешто што го направив од љубов,“ – додаде тој за враќањето во Челси.