Шчесни за зависноста од цигари: Не сум подготвен да се борам, иако знам дека е страшно

Воечех Шчесни преживува неочекувана фаза во својата кариера. Пред две години реши да се повлече од фудбалот на 34-годишна возраст, но потоа Барселона го врати на теренот и полскиот голман освои трофеи со Каталонците.

Шчесни често се појавува со цигара во рака, при што во едно интервју за „Њујорк тајмс“ отворено зборуваше за својот порок: „Се обидувам да бидам што е можно поавтентичен. Можеби не изгледа најпрофесионално во светот, но јас сум таков. Луѓето знаат дека имам зависност од која не можам да се ослободам“.

Поранешниот голман на Арсенал, Јувентус и Рим призна: „Мислам дека многу фудбалери имаат зависности, било да е тоа никотин, алкохол или коцкање. Јас сум играч кој отворено зборува за тоа. Тоа е зависност против која не сум ни подготвен да се борам“.

Сепак, тој даде јасна порака за младите: „Никогаш не би советувал никому да почне да пуши. Тоа е страшно нешто и сите треба да го избегнат“.