Швајцарците огорчени по елиминацијата од Аргентина: Игравме против судиите, ВАР и 70.000 навивачи

Селекторот на фудбалската репрезентација на Швајцарија, Мурат Јакин, не го криеше незадоволството од судењето по поразот на неговата селекција од Аргентина во четвртфиналето на Светското првенство.

Јакин остро ги критикуваше судијата Жоао Пињеиро и ВАР-системот, алудирајќи дека одлуките биле во корист на актуелниот светски шампион.

Швајцарија достоинствено се прости од Мундијалот, но еден ден по елиминацијата страстите не стивнуваат. Говорејќи на прес-конференција во друштво на претседателот на Фудбалскиот сојуз на Швајцарија, Петер Кнебел, и директорот на репрезентацијата, Пјерлуиџи Тами, Јакин упати сериозни обвинувања на сметка на судиите.

„Не игравме само против одличната Аргентина и светските шампиони. Игравме и против 70.000 аргентински навивачи, судијата и ВАР“, изјави видно фрустрираниот Јакин.

Швајцарскиот стратег особено го налути исклучувањето на напаѓачот Брел Емболо, за кое сметаше дека било премногу строго досудено, кратко коментирајќи:

„Мислам дека тоа е непотребно правило.“

Да потсетиме, Емболо го заработи вториот жолт картон откако ВАР се повика на правилото за „погрешен идентитет“. Главниот судија првично досуди прекршок врз Емболо, но по повикот од ВАР-собата и прегледувањето на снимката, ја промени одлуката и му додели втор жолт картон на швајцарскиот напаѓач поради симулирање.

Иако и претседателот на Сојузот, Петер Кнебел, доведе во прашање одредени судиски одлуки, нагласи дека Швајцарија не бара оправдување за поразот од „гаучосите“.

„Не сакаме да звучиме како губитници кои само се жалат. Секако дека сме тажни, што е сосема разбирливо ден по натпреварот. Но, пред сè, неизмерно сме горди на нашиот тим“, порача Кнебел.

Неговите зборови ги потврди и директорот на репрезентацијата, Пјерлуиџи Тами.

„Мораме да бидеме горди на начинот на кој овој тим нè претставуваше на толку важен и голем турнир“, изјави Тами.

И покрај големата фрустрација поради судиските одлуки што го одбележаа ова четвртфинално соочување, Швајцарците го напуштаат натпреварувањето со кренати глави. Од друга страна, Аргентина го продолжува походот кон одбраната на светската титула и во полуфиналето на Светското првенство ќе игра против Англија.