Вечното ривалство на Англија и Аргентина, на теренот, но и надвор од него, Меси за прв пат игра против „Гордиот албион“!

Откако Шпанија синоќа избори пласман во финалето на Светското првенство во фудбал, пред нас е големото дерби меѓу Англија и Аргентина, по кое ќе биде познато кои две репрезентации ќе се борат за титулата светски шампион.

Ривалство на теренот и надвор од него.

Англија и Аргентина имаат многу нерасчистени односи, а набојот пред овој натпревар може да се почувствува на секој чекор.

Двете репрезентации не се сретнале во натпреварувачки натпревар од 2002 година. Тогаш, на Светското првенство, Дејвид Бекам од пенал им донесе победа на Англичаните со резултат 1:0.

Во меѓувреме, Англичаните победија и на еден пријателски натпревар, но сè уште не ѝ се одмаздија на вистински начин на Аргентина за „Божјата рака“, со која Диего Марадона во 1986 година ја шокираше Англија и го измами фудбалскиот свет.

Двете земји имаат затегнати односи и поради војната за Фолкландските Острови. Фолкландската војна се водеше меѓу Велика Британија и Аргентина во период од 10 недели во 1982 година. Заврши по 74 дена борби, на 14 јуни 1982 година, со предавање на аргентинските сили. Островите потоа повторно беа ставени под британска контрола.

Во овој натпревар нема фаворит, а аналитичарите им даваат еднакви шанси и на едната и на другата репрезентација да се пласираат во финалето.

Доколку Англија се пласира понатаму, ќе добиеме реприза на финалето од Европското првенство 2024 година со Шпанија. Тоа значи дека две последователни големи натпреварувања ќе имаат финале меѓу Англичаните и Шпанците. Тоа би била и можност за одмазда на селекцијата на „Трите лава“.

Од друга страна, пласманот на Аргентина во финалето би значел дека оваа јужноамериканска репрезентација ја продолжува борбата за одбрана на титулата светски шампион, а нов трофеј за Лионел Меси би го зацврстил на врвот меѓу најголемите фудбалери на сите времиња. Интересно е тоа што Меси за прв пат во својата кариера во дресот на Аргентина ќе игра против Англија.

Ова ќе биде и дуел што може да го одлучи освојувачот на „Златната топка“ за оваа сезона, во зависност од тоа што ќе направат Хари Кејн на едната и Лионел Меси на другата страна. Во моментов тие се во најтесниот круг кандидати.

Во играчки аспект, можеби мала предност е на страната на Англија, но затоа Аргентина е таа што има најголема хармонија во тимот од сите репрезентации на првенството. Токму таквиот пристап и менталитет ја доведоа до полуфиналето, иако неколкупати беше на прагот на елиминација.

За време на Светското првенство многу се зборува за судењето, а има и такви што ја обвинуваат ФИФА дека ги фаворизира Аргентинците, па така името на судијата привлече големо внимание.

Натпреварот ќе го суди Американецот со мароканско потекло Исмаил Елфат, човек кој нема многу искуство на ова ниво, со должно почитување кон американската МЛС лига. Особено затоа што се очекува многу набој и деликатни задачи за судијата на овој натпревар.

Дуелот се игра на стадионот „Мерцедес-Бенц“ во Атланта пред повеќе од 70.000 гледачи. Иако Англија има повеќе навивачи на Мундијалот во Америка, нема сомнеж дека темпераментните Аргентинци ќе создадат пожестока и повжешка атмосфера.