Антонели: Во Мерцедес нема ‘број еден’ возач, за титулата сè уште не размислувам

Кими Антонели пристигнува во Мадрид за Големата награда на Шпанија во Формула 1 во најдобра форма оваа сезона. Италијанецот е на првото место во поредокот со предност од 66 поени пред неговиот најблизок ривал, тимскиот колега во Мерцедес, Џорџ Расел.

Тој доаѓа по незаборавна победа во Монца, трка каде што ги освои и срцата на навивачите на Ферари. “Беше прекрасно за мене да видам толку многу навивачи на Ферари како навиваат и го извикуваат моето име додека бев на подиумот, па дури и за време на трката”, изјави Антонели.

“Мислам дека навивачите направија разлика, бидејќи во последните десет или петнаесет круга, секогаш кога излегував од првиот свиок, гледав на трибините десно и забележував дека сите стануваат кога поминувам”, рече Антонели.

И покрај оваа извонредна форма и големата предност во поредокот, Антонели сè уште се чувствува нескротлив кога се зборува за титулата светски шампион: “Ни сам не знам колку трки има останато, така што има уште многу пат пред нас,” изјави возачот на Мерцедес.

“Мислам дека е сè уште рано и не сакам да почнам да размислувам за шампионатот. Монца покажа дека не се грижев за поредокот, едноставно се обидував да победам и да го дадам максимумот. Тоа е мојот пристап”, додаде 20-годишникот.

“Можат да се појават ситуации во иднина каде ќе го разгледам шампионатот пред да донесам одлука. Но, она што сакам да го избегнам по секоја цена е да одам на патеката размислувајќи или грижејќи се за шампионатот”, рече Антонели.

Во врска со внатрешниот ривалитет во Мерцедес со Џорџ Расел, тој изрази уверување дека тимот нема да покажува фаворизирање: “Не верувам дека постои вистински ‘број еден’ возач во Мерцедес, бидејќи тие сакаат да ни дадат на двајцата исти можности”.

“Џорџ е извонреден возач и беше во одлична форма на последните две трки, затоа секако не ми се чини дека има ‘број еден’ возач. Тимот нè третира еднакво и ни дава исти шанси”, рече Антонели.

“Не се чувствувам како неприкосновен лидер; напротив, чувствувам дека сме и двајцата во еднакви позиции. Така треба да биде и тоа е вистинскиот пристап”, рече Италијанецот.