Даниел Малдини позитивен на алкотест, одземена му е возачката дозвола по сообраќајната несреќа

Даниел Малдини беше позитивен на алкотест и му е одземена возачката дозвола по сообраќајната несреќа со „Порше Карера“, во која беше вклучен вчера наутро во Милано. Фудбалерот на Каљари регистрираше вредности од 0,91 мг/л на првиот тест и 0,89 мг/л на вториот, кои беа направени на местото на настанот од страна на општинската полиција. Се очекуваат резултатите од болницата за да се верификува присуството на наркотични супстанции.

Што значи 0,91 мг/л? Оваа вредност на алкотестот кореспондира со 1,82 г/л алкохол во крвта. Според членот 186 од италијанскиот сообраќаен кодекс, над 1,5 г/л претставува најтешка категорија на кривично дело, со суспензија на возачката дозвола за 1-2 години и конфискација на возилото.

Според реконструкцијата на несреќата од полицијата, Малдини влегол на „Виа Карачоло“ од „Виа Толентино“ без да даде предност на еден Голф. Неговото „Порше“ удрило во другото возило, кое потоа удри во паркиран Мерцедес.

Малдини беше пренесен во болница, но излезе веднаш од таму. Адвокатот Данило Буоњорно изјави: „Даниел е во ред и не претрпе никакви повреди, ниту пак потешки“.