Доналд Трамп со дозвола да ја врачи светската титула на новиот шампион

Претседателот на САД Доналд Трамп доби зелено светло да го прекрши протоколот и лично да го врачи трофејот на светскиот шампион на финалето на Светското првенство во 2026 година, кое ќе се одигра на стадионот „Метлајф“ на 19 јули.

Од ФИФА немаат забелешки Трамп да го заобиколи вообичаениот редослед на церемонијата и директно да му го предаде пехарот на капитенот на победничката селекција. Според информациите, тој веќе бил известен дека желбата на ФИФА е токму тој да ја врачи купата на новите прваци, а можно е и да остане на подиумот додека фудбалерите слават околу него.

Ова би било повторување на сцените од Светското клупско првенство, кога Трамп стоеше до капитенот на Челзи, Рис Џејмс, во моментот кога овој го подигна трофејот. Коул Палмер делуваше збунето додека стоеше непосредно зад светскиот лидер. Иако првично претседателот на ФИФА, Џани Инфантино, се обиде да го замоли Трамп да се повлече, потоа ја промени тактиката и го охрабри да остане на своето место, додека ѕвездите на лондонскиот клуб славеа – исто така на стадионот „Метлајф“.

Вообичаено, протоколот на ФИФА налага трофејот од Светското првенство најнапред да се постави на посебна поставка, пред да биде подигнат на подиумот од некој од фудбалерите шампиони. Сега, ФИФА ќе му остави на лична проценка на Трамп дали ќе остане со тимот или ќе се повлече заедно со останатите официјални лица.

Извори од Белата куќа проценуваат дека Трамп повторно ќе избере да биде во центарот на вниманието наместо да се повлече во заднина. Претседателот го пропушти стартниот триумф на националниот тим на САД со 4:1 против Парагвај поради преклопување со други обврски. Во неделата тој го прослави својот 80-ти роденден и 250-годишнината на Америка со настан на УФЦ на ливадата пред Белата куќа. И покрај тоа, се очекува да присуствува на финалето, а извори од Белата куќа не ја исклучуваат можноста да присуствува и на уште неколку натпревари за време на турнирот.