Една од најуспешните фудбалски академии го носи името на Роналдо

Португалскиот гигант Спортинг од Лисабон одлучи да ја преименува младинската академија во чест на Кристијано Роналдо.

Сега академијата на славниот клуб од Лисабон го носи името на португалскиот репрезентативец и еден од најдобрите фудбалери во светот.

Роналдо ги направи првите чекори во Спортинг, од каде замина во Манчестер Јунајтед, а подоцна и во Реал Мадрид и Јувентус.

“Горди сме да објавиме дека клупската академија ќе го носи името на Кристијано Роналдо. Академијата ќе го овековечи името на еден од најголемите симболи што ги создаде и ќе биде инспирација за сите млади таленти”, објави Спортинг.

Роналдо играше за Спортинг од 1997 година. Роден е на островот Мадеира, но на само 12 години стана член на еден од најголемите клубови во неговата земја. Дебитираше во 2002 година на 17-годишна возраст, а неговиот талент прв го забележа Сер Алекс Фергусон кој го однесе во Манчестер во 2003 година.