Фелипе Мело нема сомнежи: Нејмар ќе се обедини со Меси, ќе формира MSN во Интер Мајами

Нејмар може да се пресели во Интер Мајами во јануари, откако неговиот договор со Сантос истекува во декември. Веста ја објави поранешниот играч од средниот ред на бразилската репрезентација, Фелипе Мело, кој тврди дека бразилската ѕвезда ќе се обедини со своите поранешни соиграчи од Барселона, Лионел Меси и Луис Суарез.

Мело ја направи оваа изјава на својот канал на Јутјуб, велејќи дека Нејмар може да отпатува кон САД на почетокот на следната година: “Еден пријател ми откри дека Нејмар ќе оди да игра во Мајами во јануари. Ако се случи, ќе бидам првиот што ја објави веста”.

Ако трансферот се реализира, ќе се обедини легендарното трио “MSN”, кое постигна вкупно 363 гола за три сезони во Барселона, пред рекордниот трансфер на Нејмар во ПСЖ за 222 милиони евра. Во првата сезона заедно, Меси, Суарез и Нејмар постигнаа 122 гола, водејќи ја Барселона кон триумфот во Лигата на шампионите.