ФИФА се огласи: Нема казна за ВАР-судијата Шон Еванс по контроверзниот гест

Дисциплинската комисија на ФИФА не утврди прекршување во постапките на ВАР-судијата Шон Еванс, кој беше снимен како прави гест што се поврзува со групи за бело надмоќие пред натпреварот меѓу Германија и Курасао. Австралискиот арбитар ги негира сите расистички мотиви и објасни дека станувало збор за „неволен грч“.

ФИФА соопшти дека по спроведена истрага не пронашла основ за санкција против Еванс, раководител на системот за видео-асистент судии за дуелот Германија – Курасао. Инцидентот се случи во неделата, за време на претставувањето на судискиот тим пред почетокот на мечот. Веќе во понеделникот, светската федерација објави дека случајот е затворен, а самиот Еванс категорично отфрли каков било расистички умисол.

Од ФИФА наведеното е дека независната дисциплинска комисија, по детална анализа на случајот поврзан со видео-асистент судијата Шон Еванс, не пронашла докази за прекршување на Дисциплинскиот кодекс на ФИФА и дека е земено предвид неговото објаснување.

Полемиката околу гестот произлезе поради неговата поврзаност со расистичката идеологија за „бела сила“. Знакот „ОК“, кој екстремно десни групи го толкуваат како симбол на бело надмоќие, предизвика лавина реакции кога камерите го забележаа движењето на раката на арбитерот.

Еванс даде објаснување дека не испратил никаква порака, припадност или убедување од каков било вид, туку дека движењето било неволно и несвесно. Тој посочи дека снимките подоцна за време на натпреварот покажуваат како неколкупати го повторил истото движење додека држел пенкало меѓу прстите. Еванс нагласи дека разбира како гестот бил протолкуван и изрази жалење за недоразбирањето, но подвлече дека не го направил симболот свесно или намерно.

„Да бидам судија на Светско првенство е најголемата чест во мојата кариера и со нетрпение очекувам да ги поддржувам колегите до крајот на турнирот“, порача Еванс, откако одлуката на ФИФА стави точка на случајот.