Инфантино за можноста за продажба на правата за Светското првенство: Ова е прекрасна можност!

Претседателот на ФИФА, Џани Инфантино, го сподели своето мислење за создавањето комерцијална структура за продажба на дел од правата за Светското првенство.

– Ова е прекрасна можност за забрзување на развојот на фудбалот низ целиот свет. Но, ова е само предлог, а не обврска. Изборот е на нашите асоцијации-членки на ФИФА и ние сме тука да разговараме со сите, напиша Инфантино на социјалните мрежи.

На 28 јули, ФИФА ги потврди плановите за создавање нова структура на која ќе бидат префрлени медиумските и комерцијалните права на организацијата, вклучително и оние за Светското првенство. Се очекува да бидат продадени повеќе од 20 проценти од нејзините акции. Приватните инвеститори ќе платат приближно 4,2 милијарди долари за овие удели, кои ФИФА вети дека ќе ги потроши за развој на фудбалот.

Предлогот на претседателот на ФИФА е поддржан од „Thrive Capital“, инвестициска фирма основана од Џошуа Кушнер, брат на Џаред Кушнер, зет на американскиот претседател Доналд Трамп.