Македононија У21 поразена од Србија во евроквалификациите

Фудбалската репрезентација на Македонија до 21 година вечерва загуби од Србија на гостувањето во Белград, со 2-1 (1-0) во рамки на седмото коло од квалификациската групата Х за пласман на Европското првенство 2023.

Србија имаше одличен старт на натпреварот под водство на новиот селектор Горан Стевановиќ и поведе веќе во деветтата минута преку Милош Пантовиќ.

Македонските фудбалери настојуваа да дојдат до израмнување на резултатот, но се најдоа во нови проблеми во 67, минута, кога поради два жолти картони беше исклучен Бесир Исени.

Србија ја валоризираше предноста од фудбалер во 82. минута преку Немања Јовиќ, а избраниците на селекторот Драган Канатларовски иако веќе во следниот напад ја намалија предноста на домаќините со голот на Бојан Димовски, сепак, немаа сили до крајот да извлечат бод од гостувањето во Белград.

Македонската репрезентација со овој пораз остана на шест бодови и сега е четвртопласирана во групата пред следниот дуел во вторник во Скопје против Фарски острови.