Меси до Левандовски: Вие ја заслужувате Златната топка

Лионел Меси синоќа по седми пат ја освои Златната топка.

Аргентинскиот репрезентативец е избран за најдобар фудбалер на светот за 2021 година во изборот на францускиот магазин Франс Фудбал, а триумфираше пред Роберт Левандовски.

Меси минатата година го освои првиот голем трофеј со Аргентина – Копа Америка, а покрај тоа беше единствениот на ниво кога е во прашање Барселона.

Минатата сезона одигра 49 натпревари и постигна 40 гола со 16 асистенции. Со Барса го освои Копа дел Реј и беше најдобар стрелец на шпанската Ла Лига и Копа Америка.

Меси претходно ја освои Златната топка во 2009, 2010, 2011, 2012, 2015 и 2019 година.

На доделувањето Меси призна дека наградата ја заслужува и Левандовски. Напаѓачот на Баерн требаше да ја добие Златната топка минатата зима, но поради пандемијата на коронавирус, доделувањето  на награда беше откажано.

„Сите знаат и сите се согласуваме дека требаше да бидеш победник минатата година. Се надевам дека Франс Фудбал ќе ти ја додели Златната топка за 2020 година. Сите веруваме дека ја заслужуваш и ќе ја имаш дома“, рече Меси.

„Неверојатно е да се биде повторно овде. Денеска морам да бидам во Париз и многу сум среќен. Навистина сакам да продолжам да се борам за нови предизвици. Не знам колку ми преостана, но се надевам дека е многу затоа што го сакам фудбалот. Им благодарам на сите мои соиграчи од Барса, ПСЖ и Аргентина. Нешто ми недостасуваше, но тоа се смени оваа година со освојувањето на Копа Америка. Тоа беше посебна ноќ за мене“, додаде Меси.