Неверојатно: На Икарди му е суспендирана возачката дозвола до 2099 година, може да се врати зад воланот на 105 години

Видео објавено од Мауро Икарди во автомобил, заедно со неговата партнерка Евгенија „Чина“ Суарез, му претставува голем проблем на аргентинскиот напаѓач. Според различни медиуми во Јужна Америка, аргентинските власти му ја суспендирале дозволата за управување со возила на јавните патишта до 2099 година.

Случајот започна по видеото во кое Суарез се појавува до возачот без сигурносен појас и со главата извадена од прозорецот. По верификациите, властите утврдија дека Икарди нема валидна дозвола во Аргентина.

Икарди, кој има 33 години, тврди дека поседува италијанска дозвола која важи до 2029 година и реагираше остро кон властите: „Занимавајте се со регулирање на патиштата за подобрување на сообраќајот во земјата, наместо да пишувате на Твитер и да губите време. Престанете да лажете и почнете да работите“.

Ако суспензијата до 2099 година се потврди, Икарди ќе може повторно да управува со возило кога ќе има 105 години.