Се разлутил и се заканил дека ќе си замине, откриена расправијата на Перез на ВИП трибината на „Метрополитано“

Пако Гонзалес извести во програмата „Tiempo de Juego“ на „Кадена КОПЕ“ за една „расправија“ на Флорентино Перез на претседателската трибина на стадионот „Метрополитано“, за време на мадридското дерби што го доби Атлетико со 2-1.

„Флорентино Перез се разлутил многу што Енрике Рикелме бил на претседателската трибина на Метрополитано“, – изјави Гонзалес.

После тоа, Хуанма Кастањо даде повеќе детали во „Ел Партидазо“. Според него, сè започнало за време на ручекот меѓу управите на двата клуба, пред натпреварот. Перез, кој дошол на „Метрополитано“ поради добрата релација со колегата Енрике Серезо, бил информиран дека Енрике Рикелме, кандидат за претседател на Реал Мадрид, против кој Перез ги добил последните избори, бил поканет на претседателската трибина.

„Флорентино избувна со гнев и рече дека со неговото присуство ќе замине, ќе го напушти стадионот. Ако се сретнеше со него во некој момент, ќе ја напуштеше трибината“, – раскажа Кастањо.

Според него, Перез се смирил и останал да го следи натпреварот, но реагирал жестоко прашувајќи зошто Рикелме се наоѓал на претседателската трибина.