Телевизиите ќе мора бесплатно да ги емитуваат најважните спортски настани

Агенцијата за аудио и аудиовизуелни медиумски услуги донесе нова одлука со која се утврдува листа на настани од особено значење за јавноста во Северна Македонија, што радиодифузерите ќе мора да ги емитуваат бесплатно за гледачите. Со ова се обезбедува најважните спортски случувања да бидат достапни за сите граѓани, без претплата и без кодирање.

На листата се вклучени летните и зимските Олимписки игри, Параолимписките игри и Олимписките игри за глуви. Опфатени се и натпреварите од светските и европските првенства во атлетика, фудбал, кошарка, одбојка и ракомет, како и сите официјални натпревари на македонските репрезентации. Во обврската влегуваат и натпреварите од Лигата на шампиони, Лигата Европа и Конференциската лига, особено кога во нив настапуваат клубови од Северна Македонија.

Содржините од листата треба да се емитуваат во живо и во целост. Доколку истовремено се одржуваат повеќе настани од листата, дел од нив може да се прикажат одложено, но не подоцна од дваесет и четири часа по завршувањето на настанот.

Право на емитување ќе имаат радиодифузери кои ги исполнуваат пропишаните услови, меѓу кои покриеност со сигнал од најмалку осумдесет проценти од населението, бесплатен и некодиран пристап до програмата и емитување на македонски јазик. Новата одлука ја поништува претходната листа од две илјади и петнаесетта година и стапува во сила еден ден по објавувањето во Службен весник.