Тиквеш го елиминираше Вардар, заврши сонот за двојна круна!

Шест екипи попладнево се пласираа во четвртфиналето на фудбалскиот Куп на Македонија.

Во дербито од осминафиналето од најмасовното натпреварување,Тиквеш во Скопје го совлада Вардар со 3:1. Серијата погодоци ја отвори Окере Висдом во 49. минута. Девет минути подоцна Бобан Николов израмни на 1:1, а во 62. минута Сила Н’Фанли му донесе предност на Тиквеш од 2:1. Конечниот резултат го постави Емануел Лавал во 75. минута.

Македонија ЃП по подобро изведување пенали ја елиминираше штипска Брегалница. Гостите во првото полувреме имаа предност од 2:0, а стрелци на головите беа Иван Николов во 26. и Иван Глигоров во 36. минута. Во 58. минута Борјан Томовски намали на 2:1, а во претпоследната минута од дуелот, Бесмир Исмани го постигна вториот погодок за Македонија ЃП. Во пенал серијата, домаќинот беше поуспешен и на крајот славеше со 5:4.

Еден гол го одлучи дуелот меѓу Скопје и Новаци. Стрелец на победничкиот погодок за домашниот состав беше Милош Гордиќ во 67. минута.

Струга дуелот против Беласица го реши уште во првиот дел и тоа со головите на Марјан Радески во 35. и 38. минута.

Работнички забележа победа од 3:2 во соочувањето со Каменица Саса. Гостите од Македонска Каменица поведоа со голот на Филип Николовски во 15. минута. Девет минути подоцна Александар Богданоски израмни на 1:1, а во 31. минута истиот играч му донесе водство на Работнички од 2:1. По десет минути игра во второто полувреме Николовски повторно се запиша меѓу стрелците за израмнување на 2:2, а конечните 3:2 ги постави Богданоски во 80. минута.

Шкендија Арачиново се пласираше во четвртфиналето откако со 2:0 славеше на гостувањето во Куманово на дуелот против Башкими.

Марко Симоновски беше стрелец на првиот гол за Шкендија, а печат на победата стави Бесир Демири во 77. минута.

Во терминот од 16:30 часот Пелистер во Битола го пречекува Силекс додека за 25 ноември е закажано последното осминафинале во кое АП Брера е домаќин на Арсими.