Тотенхем „шах-мат“ очаен Челзи, ова е крајот за Потер?

Фудбалерите на Тотенхем на домашен терен го победија Челзи со 2:0, во лондонското дерби што се одигра во рамките на 25. коло од Премиер лигата.

Овој натпревар го прескокна и Антонио Конте, кој се опоравува од операција на жолчното кесе, но неговиот тим одигра токму според неговите забелешки. Тој го вовлече Челзи во „тепачка“ и го нокаутира во вториот дел.

Челзи е во страшна криза, не му се гледа крајот и останува да се види дали менаџерот Греам Потер ќе „преживее“ до следното коло, со оглед на огромниот притисок на кој е изложен и со право, бидејќи неговиот тим игра катастрофално. лошо.

Стрелци на головите беа Скип во 46 и Кејн во 82 минута.

Тотенхем се проби на посакуваното четврто место на табелата со 45 бодови и има четири бода повеќе, но и два меча повеќе од петтопласираниот Њукасл. Челзи е само десетти со 31 бод.

Првото полувреме донесе борбен и „валкан“ фудбал, со многу тензија, тактичко надмудрување и адаптација, прекини и малку шанси.

Најдобриот удар го имаше играчот од средниот ред на Тотенхем, Хојберг, кој ја затресе стативата во 27. минута.

Неверојатна сцена на крајот. Зијес му удри шлаканица на Емерсон, судијата Атвел веднаш му покажа директен црвен картон, но следеше повик од ВАР собата, па судијата по прегледувањето на снимката ја смени одлуката и му додели жолт картон на Мароканецот.

Само што започна вториот дел, Тотенхем поведе со фантастичниот гол на младиот Оливер Скип. Најпрвин Кепа го одбрани ударот на Емерсон од добра позиција, па Енко Фернандез ја избрка топката од шеснаесетникот и накратко ја елиминира опасноста. Тогаш Жоао Феликс беше недозволиво лежерен при примањето на топката, Скип го „дувна“ во дуелот и од околу 20 метри испрати вистински проектил, кој со помош на гредата беше соборен во мрежата на Кепа.  Тоа беше првиот гол на младиот англиски играч за врска во сениорскиот тим на „петлите“.

По овој гол гледавме слична игра како во првиот дел, односно вистинска „тепачка“ на теренот што му одговараше на Тотенхем.

Челзи сезонава е страшен, а во безидејност се „гушеше“ и на оваа игра. Сините не можеа да создадат ништо во фазата на напад, а конечниот удар им беше зададен во 82. минута.

Сон, кој влезе во игра само три минути претходно, изведе корнер од десната страна, Дајер извонредно скокна на линијата од шеснаесетникот и ја додаде топката до подалечната статива, каде Хари Кејн беше немилосрден и погоди за 2:0.

Во финишот Тотенхем рутински сочуваше два гола предност и забележа важен триумф во борбата за место во Лигата на шампионите.