Видео: Емотивна реакција на родителите на Модриќ по голот, Словенците воодушевени

Во пријателски натпревар пред Светското првенство, Хрватска ја совлада Словенија со 2:1, а еден од највпечатливите моменти се случи на трибините на стадионот во Вараждин. По погодокот на Лука Модриќ, камерите го забележаа емотивното славје на неговите родители.

Капитенот во 51-та минута со маестрален удар ја доведе Хрватска во водство, а реакцијата на неговите родители, Радојка и Стипе Модриќ, ја снимија камерите на словенечкиот портал Екипа. Сцената бргу привлече внимание и предизвика бројни позитивни реакции.

Словенечките медиуми му посветија посебно внимание на тој момент, нагласувајќи дека за 40-годишниот капитен ова можеби била и последната утакмица на домашен терен во дресот на репрезентацијата. Се погласни се шпекулациите дека Модриќ по Светското првенство би можел да ја заврши својата репрезентативна кариера.

„Радојка и Стипе Модриќ покажаа колку им значат головите на нивниот син, колку се горди на него и се радуваа како да беше тоа прв погодок на Лука за Хрватска“, пренесе Екипа, додавајќи дека гестовите за време на славјето „навистина го греат срцето“.

За Лука Модриќ ова беше 198-ми настап за хрватската репрезентација и 29-ти погодок. Само неколку минути по голот, капитенот ја напушти играта под овации од трибините во Вараждин, што дополнително ја засили емоцијата околу целиот настан.