Ел Класико може само во финалето на Суперкупот

Шпанската фудбалска федерација донесе интересна одлука денес за претстојните натпревари од Суперкупот.

Четири екипи ќе се борат за трофејот кон средината на јануари во Севиља, а тоа се шампионот Реал Мадрид, вицешампионот Барселона и финалистите од Купот, Атлетик Билбао и Реал Сосиедад.

Бидејќи финалето на Купот за минатата сезона не беше одиграно, беше одлучено овие екипи да не се соочуваат едни со други во полуфиналето од Суперкупот, а на ждрепката ќе можат да ги извлечат Реал или Барселона.

Според правилата на Суперкупот, шампионот (Реал Мадрид) требаше да игра со губитникот од финалето на Купот, и вицешампионот на Шпанија (Барселона) против победникот во Купот.

Како и да е, бидејќи финалето не се играше, беше решено да се извлече кој ќе игра со Реал, а кој со Барселона, а наскоро ќе дознаеме за какви парови станува збор. Така, славното Ел Класико е можно само во финалето на Суперкупот.

Полуфиналните дуели се закажани за 13 и 14 јануари, а финалето е закажано за 17 јануари.