Инфантино има ривал, 55-годишниот Швајцарец е кандидат за претседател на ФИФА: Еве ја неговата мисија

Рамон Вега, поранешниот 55-годишен одбранбен играч на Калјари и Тотенхем, го објави својот план за кандидатура на претседателските избори на ФИФА следната година. Тој е првиот што го предизвикува актуелниот претседател, Џани Инфантино. Како поранешен играч на швајцарската репрезентација, Вега работи во финансискиот сектор откако се повлече од професионалниот фудбал во 2004 година.

„Кандидатирам за да ја обединам глобалната фудбалска фамилија, да спроведам вистински и долгорочни реформи, да ја модернизирам ФИФА за 21 век, да ја вратам стабилноста и кредибилитетот, како и да ја обновам довербата која на нашиот спорт итно му е потребна“, изјави тој.

Вега се обидел да кандидатира и претходно, во 2015 година, по суспензијата на поранешниот претседател Сеп Блатер. Четири години подоцна, тој го најавил планот да го предизвика Инфантино, но не успеал да ја обезбеди потребната поддршка за да биде вклучен во листата на кандидати, бидејќи не добил поддршка од пет од 211 членки на сојузот.

„Кандидатирам затоа што мојот живот ме подготвил да му служам на овој спорт“, изјави Вега, додавајќи: „Фудбалот не им припаѓа на претседателите, конфедерациите или раководителите. Фудбалот е спорт на народот и им припаѓа на сите: играчите, тренерите, судиите, навивачите, волонтерите, клубовите, лигите, сојузите и заедниците“.

„Тековното раководство ја деморализирало фудбалската светска јавност. Лошото управување го компромитирало кредибилитетот на ФИФА и ја нагризувало довербата внатре во глобалната фудбалска фамилија. Мораме да го спречиме ескалирањето на овој конфликт. Борбите за моќ на највисоко ниво не смеат да ги оштетат оние кои се најважни: играчите, тренерите, судиите и навивачите ширум светот“, рече тој.

„Тие не се одговорни за овие конфликти. Тие заслужуваат повеќе. Фудбалот е одржуван вештачки, прикачен на машини за да не умре“, рече Рамон Вега.