Лига Европа вечерва ќе ги добие своите полуфиналисти

На вечерашните реванш дуели од четвртфиналето, ќе се дознаат полуфиналистите од Лигата на Европа.

Манчестер Јунајтед вечерва треба да има најмалку главоболки. „Црвените ѓаволи“ славеа со 0:2 на првиот натпревар против Гранада, па вечерва бранат огромна предност како домаќини.

Славија Прага има историска можност да се пласира во полуфиналето. По нерешениот резултат 1-1 во Лондон, чешкиот претставник вечерва ќе се обиде да го скалпира славниот Арсенал и да запечати уште една лоша сезона за „топџиите“.

Иако беа поразени на првиот натпревар со резултат 0:1, Динамо сигурно ја бара својата шанса на реваншот против Виљареал. Тимот од Загреб веќе направи одличен резултат, а вечерва доколку ја изненади жолтата подморница, тоа ќе биде огромен бонус за одлична сезона.

И, конечно, во дербито од оваа рунда на натпреварувањето, Рома го пречекува Ајакс. Рома славеше со 1:2 на првиот натпревар, па ќе имаат убава можност да се пласираат во уште едно европско полуфинале.

Сите натпревари започнуваат во 21 часот.