Мурињо имал искрен разговор со ѕвездата на Реал Мадрид, му порачал дека нема да игра!

Новиот тренер на Реал Мадрид, Жозе Мурињо, наводно имал искрен разговор со Едуардо Камавинга, при што јасно му ставил до знаење дека оваа сезона тешко ќе избори позначајна минутажа во дресот на Кралскиот клуб.

Според информациите на шпанскиот новинар Серхио Валентин, португалскиот стратег бил целосно директен во разговорот со францускиот играч за врска по почетокот на подготовките за новата сезона.

„Жозе Мурињо разговараше со Едуардо Камавинга и му ја објасни неговата ситуација. Ќе му биде многу тешко да добие минути. Мурињо беше директен кон него“, наведува Валентин.

Позицијата на Камавинга дополнително би можела да биде загрозена доколку Реал Мадрид успее да го реализира трансферот на играчот за врска на Манчестер Сити, Родри, за кого во последните недели интензивно се шпекулира. Во тој случај конкуренцијата во средниот ред би била уште посилна, а се очекува Орелиен Чуамени да остане пред Камавинга во хиерархијата.

Францускиот репрезентативец зад себе има сезона 2025/26 која не ги исполни очекувањата, поради што сега се соочува со голема борба за место во тимот.

Сепак, и покрај предупредувањето што го добил од Мурињо, Камавинга наводно нема намера да го напушти „Сантијаго Бернабеу“. Неговата желба е да остане во Мадрид и да се избори за своето место во тимот во текот на претстојната сезона.