Новата сензорска топка ѝ поништи гол на Хрватска во 103-та минута и ја елиминира од Мундијалот

Португалија победи со 2:1 и ја исфрли Хрватска во шеснаесетинафиналето на Светското првенство во САД, Канада и Мексико, по драматичен финиш во кој на Хрватите им беше поништен гол во 13-та минута од судиското надополнување, односно во 103-тата минута.

Хрватските фудбалери и навивачи веќе славеа откако Јошко Гвардиол одблиску го совлада португалскиот голман и се чинеше дека мечот ќе оди во продолженија. Но веднаш потоа најновата технологија на ФИФА покажа дека неговиот соиграч и асистент Марко Пашалиќ бил во офсајд. Пашалиќ очигледно беше во недозволена позиција, но клучната дилема беше дали Игор Матановиќ ја закачи топката со глава пред истата да стигне до него; доколку немало допир, погодокот ќе беше валиден. Норвешкиот судија Еспен Ескас ја разгледа снимката, но повторувањата не донесоа јасен доказ.

Одлучувачки беше сигналот што го регистрираше сензорот во топката, кој укажа на допир од Матановиќ, по што голот беше поништен. Микрочипот вграден во топката детектира секој контакт и испраќа прецизни податоци до ВАР-собата во реално време.

Одлуката предизвика хаос: разгневени хрватски навивачи фрлаа пластични шишиња кон теренот, што беше кулминација на неверојатниот меч исполнет со поништени голови, дискутабилен пенал за Португалија и погодок во 94-тата минута.

Така продолжува сонот на Кристијано Роналдо, а завршува за Лука Модриќ — двајца четириесетгодишници кои решија уште еднаш да ги предводат своите репрезентации на мундијалската сцена.

„Нема да навлегувам многу во поништениот гол, но ќе кажам дека судењето беше многу слабо. Видовте до кој степен се убиваат емоциите. Сите овие одлуки ве влечат назад и ја одземаат радоста од фудбалот. ВАР ги убива емоциите, отидовме предалеку со ВАР“, изјави хрватскиот селектор Златко Далиќ.