Новиот португалски селектор не се откажува од Роналдо
Фото: Soccer Football – FIFA World Cup Qatar 2022 – Group H – Portugal v Uruguay – Lusail Stadium, Lusail, Qatar – November 28, 2022 Portugal’s Cristiano Ronaldo and Bruno Fernandes celebrate after the match REUTERS/Kai Pfaffenbach – UP1EIBS1MR3U1
Новиот селектор на фудбалската репрезентација на Португалија, Роберто Мартинез, го објави списокот со 26 фудбалери за натпреварите против Лихтенштајн и Луксембург на стартот од квалификациите за ЕУРО2024, а меѓу повиканите се најде и фудбалерот на саудиски Ал Наср, Кристијано Роналдо.
„Се сретнав со сите 26 фудбалери кои беа (на Мундијалот) во Катар. Важно е да разговараме, да ја видиме нивната посветеност. А, Роналдо е многу посветен фудбалер. Ова е моја одлука. Тој може да ни донесе искуство, а тоа е многу важна особина за тимот“, изјави Мартинез.
Роналдо (38) со 118 голови во португалскиот дрес е светски рекордер според постигнати погодоци на репрезентативен план, додека со 196 настапи за репрезентацијата во моментов го дели првото место на вечната листа во таа категорија со Кувајќанецот Бадер Ал – Мутава.
„Годините не ме интересираат. Роналдо има победнички карактер и сакам тоа да им го пренесе на другите играчи. Што се однесува до статусот, има ист како и сите други во тимот“, рече Мартинез.
