Артета ја згасна надежта на навивачите на Арсенал, ништо од најпотребното засилување?!

Поразот од Ливерпул, трет врзан во сите натпреварувања, ги вклучи сите аларми во Арсенал.

Тимот на Микел Артета не наликува на ланскиот, особено во последните неколку натпревари, а поразот од Ливерпул повторно наметна голем број теми.

Пред се, во нападот, бидејќи Габриел Жесус е единствениот вистински напаѓач, Каи Хаверц повторно се најде на мета на критичарите, додека Артета повеќе би сакал да го продаде Нкети и да донесе нов голгетер. Но, тоа во моментов не изгледа реално.

„Нов напаѓач во јануари? Во моментов тоа е нереално. Мојата работа е да ги подобрам играчите што ги имам на располагање“, изјави Артета.

Да потсетиме, Ајвон Тони најчесто се споменуваше како мета на Арсенал, но проблемот е што Брентфорд за својот напаѓач бара 100 милиони евра.

Се споменува и Доминик Соланке, кој е поевтина опција, но не и прв избор на Артета.

Арсенал испадна и од ФА Купот, во Лигата на шампионите се среќава со Порто, а во Премиер лигата е четврти со пет бода помалку од Ливерпул.