Сане си замина од кампот на германската фудбалска репрезентација

Фудбалерот Лирој Сане си замина од кампот на германската фудбалска репрезентација во Минхен поради приватни причини.

Наводно според англиските медиуми Сане се враќа во Манчестер, бидејќи неговата сопруга е пред пораѓање и фудбалерот сакал да биде со неа во деновите кои доаѓаат. Тој разговарал со селекторот Јоаким Лев, по што заклучиле дека е најдобро да ја напушти репрезентацијата.

Германскиот фудбалер има проблеми со малата минутажа во репрезентација. Тој синоќа настапи на натпреварот против Франција пред самиот крај во 83-та минута, а претходно селекторот Лев го изостави за Светското првенство во Русија.

Од друга страна, Сане има проблеми и во неговиот клуб Манчестер сити, каде сезонава одигра само 30 минути. Тој не е повикан за натпреварот со Њукасл во четвртото коло од Премиер лигата, а како причина за санкцијата тренерот Пеп Гвардиола ги наведе недисциплината и слабото залагање на тренинзите.