Австралискиот тренер по испаѓањето: „Горд сум“

Селекторот на австралиската фудбалска репрезентација Греам Арнолд во Доха по поразот од Аргентина изјави дека не може да биде погорд на своите играчи.

Австралија беше поразена од Аргентина со 1:2, во осминафиналето на Светското првенство.

„Им реков на момците дека не можам да бидам повеќе горд на нив и на она што ми го дадоа мене и нивната земја. Тоа беше долг и тежок пат од четири и пол години. Се разбира, малку сум разочаран, бидејќи јас Мислам дека можевме да направиме малку повеќе. Сигурен сум дека земјата е многу горда на овие момци“,  рече Арнолд.

Тој додаде дека неговата селекција „одлично завршила работа“ против Аргентина синоќа и покрај поразот.

„Не секој ден играш со третиот најдобар тим во светот и мислам дека завршивме одлична работа. Пред првенството многу луѓе велеа дека сме најлошиот австралиски тим на сите времиња. Се пласиравме во осминафиналето и освоивме шест бода во групата, што никогаш не сме успеале“,  изјави Арнолд.

Арнолд исто така рече дека „фудбалот е спорт што ја обединува нацијата“.

„Навивачите беа многу среќни што беа на Светското првенство. Но, така треба да биде секој пат и ни треба владата да инвестира пари во развојот на овој спорт“,  изјави Арнолд.