Индонезија го сака Светското првенство во 2034 година

Индонезија започна преговори со Фудбалската асоцијација на Австралија за да поднесе понуда за домаќин на Светското првенство во фудбал во 2034 година заедно со Малезија и Сингапур.

Разговорите започнаа само неколку дена откако ФИФА ги покани членовите од Азија и Океанија да го организираат најголемото шоу на светскиот фудбал.

„Почнавме разговори со Австралија. Кога ги посетив Малезија и Сингапур, тие изразија желба да ни се придружат“, изјави Ерик Тохир, претседател на Фудбалскиот сојуз на Индонезија.

Засега единствената земја која најави дека сака Светско првенство во 2034 година е Саудиска Арабија.

Домаќини на планетарното првенство во 2026 година ќе бидат Соединетите Американски Држави, Канада и Мексико, додека шампионатот во 2030 година им беше доделен на Шпанија, Португалија и Мароко, а неколку рани натпревари ќе се играат во Аргентина, Парагвај и Уругвај.