Инцидент во Аеродром, нападнати играчите и навивачите на Башкими (ВИДЕО)

Во рамките на 15. коло во третата Северна лига, на стадионот во скопската населба Аеродром, каде се играше натпреварот помеѓу екипите на ф.к. Аеродром и Башкими, имаше инцидент, во кој играчите и навивачите на ФК Башкими беа физички нападнати.

Следува реакцијата од ФК Башкими-Куманово.

„До 69. минута натпреварот се играше во спортски дух и без забелешки. Во тој момент, 40 хулигани со маски, безбол палки, ножеви, синџири, камења и други метални алатки влегоа на трибините преку административниот дел на стадионот, од каде брутално ги нападнаа албанските гледачи/навивачи. Тимот домаќин не успеа да обезбеди никакви услови за безбедност на гледачите (ниту органите на редот, ниту полицијата, ниту персоналот за физичко обезбедување) и искористувајќи ги овие скандалозни пропусти, на хулиганите им беше многу лесно да навлезат и да го изведат нападот. Само божјо чудо  е што немаме жртви и целата работа помина само со повреди и материјална штета. На теренот завршија камења и шипки, загрозувајќи ги животите на наши играчи“, се вели во коминикето на раководството на ФК Башкими, кои нагласуваат дека предметната група не била присутна на стадионот, туку била организирана надвор од него, со единствена цел, бруталното претепување на Албанците на трибините на стадионот.